ოლიმპიელმა ქვიარ ჩემპიონმა, ტომ დეილიმ, ახალი ბიზნესი წამოიწყო, პროფესიონალი მყინთავი თავის მოქსოვილ ჯემპრებს გაყიდის.
2020 წლის ზაფხულის ოლიმპიური ჩემპიონატი გამორჩეული იყო ქვიარ მონაწილეების სიმრავლით. ყველაზე დასამახსოვრებელი კი 27 წლის ოქროს მედალის მფლობელი, ტომ დეილი აღმოჩნდა, რომელიც ტოკიოში გამართულ ოლიმპიადაზე ქსოვდა.
როგორც ცნობილი გახდა, 27 წლის სპორტსმენი ქსოვის მარტივად დათმობას არ აპირებს – გადაწყვეტილი აქვს, საყვარელი ჰობი პროფესიად აქციოს და ახალი ბრენდი დააარსოს, რომელსაც Made With Love By Tom Daley (დამზადებულია სიყვარულით ტომ დეილისგან) ერქმევა.
„მთელი ეს პროცესი ჩემთვის ნამდვილი მოგზაურობა იყო, გრძელი გზა გავიარე მას შემდეგ, რაც პირველად გადავწყვიტე ქსოვის დაწყება 2020 წლის მარტში. 18 თვის შემდეგ უკვე თამამად შემიძლია გაგიზიაროთ ის სიამოვნება, რაც ქსოვის პროცესს ახლავს”.
ოლიმპიელმა სპორტსმენმა ასევე თქვა, რომ მისი მიზანია, ადამიანებმა ხელში აიღონ საქსოვი ჩხირები, ძაფები და შეიყვარონ ქსოვა. სწორედ ამიტომ, კომპანია ყიდის არა მარტო ტომ დეილის მოქსოვილ ჯემპრებს და კაშნებს, არამედ საქსოვ კომპლექტებს დამწყებებისა და პროფესიონალებისთვის.
ტომ დეილის პირველ კოლექციაში ვიხილავთ თბილ ჟილეტებს, შარფებს, წინდებს, საბნებს, ზამთრის თბილ ქუდებსა და პლედებს.
